واشنګتن وایي له طالبانو سره پر لاسلیک شوې هوکړې ولاړ دی.

د امریکا د پوځ د مرکزي ځواکونو قومندان ویلي چې واشنګتن چمتو نه دی له طالبانو سره له هوکړې تیر شي، خو د دې هوکړې له تلپاتې کیدو هم خوښ ندی.

جنرال کینت مک‌کنزي، له امریکایي قانون جوړوونکو سره په لیدنه کې ویلي چې طالبان یوازې د خپلو ژمنو یو شمیر برخې پلې کوي.

دې امریکایي جنرال زیاته کړې: ” په ټول افغانستان کې د طالبانو له خوا د بریدونو لوړه کچه د منلو نه ده. خو دا بریدونه د ښارونو پر مرکزونو او یا هم د ایتلاف ځواکونو پر سر نه دي تر سره شوي، بلکه د مرکزونو پر سر، امنیتي پوستو او د افغان امنیتي ځواکونو پر لیرې پرتو قطعو ترسره شوي. سوچ کوم د طالبانو د بریدونو لوړه کچه له یو سازمان سره سازګاره نده چې غواړي په خپلو ویناوو عمل وکړي.”

د امریکا او طالبانو تر منځ د سولې هوکړه لیک د فبرورۍ په ۲۹ نیټه لاسلیک شو، چې د دې هوکړه لیک اساسي شرایط د افغانانو تر منځ د خبرو اترو پیل، له افغانستان څخه د بهرنیو ځواکونو وتل، له ترهګریزو ډلو سره د دې ډلې د اړیکو شلیدل او د ترهګرو پر ضد د طالبانو ډاډ دی.

د امریکا پوځ په افغانستان کې د مارچ نهمه (د دوه نۍ ورځ) له افغانستان څخه د امریکایي ځواکونو د وتلو د بهیر له پیله خبر ورکړ. دا ګام په افغانستان کې له ۱۳۰۰۰ زرو څخه ۸۶۰۰ تنو ته د امریکایي پوځيانو د شمیر د کمولو لپاره اوچت شوی دی.

 

ژباړه: نجلا مایار