سرگئی شویګو، له ارمنستان وروسته نن د یوه لوپوړې پوځي پلاوي  په راس کې آذربایجان ته ولاړ.

د آذربایجان ولسمشر الهام علي اف د روسیې له دفاع وزیر سره په لیدنه کې په قره باغ سیمه کې د جګړو دریدو لپاره د روسیې،آذربایجان او ارمنستان ګډې ویناپاڼه کې د ولادمیرپوټين ونډې لپاره له هغه څخه مننه او ستاینه وکړه.

د آذربایجان ولسمشر وویل، له ۴۴ ورځو شخړو او پوځي جګړو وورسته، دا ویناپاڼه لاسلیک شوه. چې د څو کلنې جګړې پای لپاره خورا مهم ارزښت لري.

د روسیې د دفاع وزیر سرګیې شویګو تیره ورځ د ارمنستان له لومړي وزیر نیکول پاشینیان سره په لیدنه کې د قره باغ په سیمه کې د اوربند د بهیر پر سر هوکړې او دوه اړخیزو همکاریو پرسر خبرې اترې وکړې.

د روسیې د دفاع وزیر په قره باغ سیمه کې د سولې ساتل د مسکو له لومړیتوبنو وبلل او ویې ویل چې دا هیواد به په سیمه کې د ټیکاو پیاوړتیا لپاره پوره ګامونه پورته کړي.

له بلې خوا د روسیې د بهرنیو چارو وزیر سرګیي لاوروف هم نن یوه نۍ ارمنستان ته په خپل سفر کې د دې هیواد له لومړي وزیر سره لیدنه او خبرې اترې او د ارمنستان او آذربایجان ترمنځ د اوربند بهیر یې څیړلی دی او په بیلابیلو برخو کې یې د مسکو ــ ایروان ترمنځ د همکاریو د پراختیا غوښتنه کړې ده.

دوه اوونۍ مخکې، ارمنستان او آذربایجان د روسیې په منځګړیتوب په قره باغ سیمه کې د شخړو کمیدو په موخه د اوربند یو هوکړه لیک لاسلیک کړ.

د روسیې ولسمشر د دې درې اړخیزې هوکړې نقض په قره باغ سیمه کې د جګړې د اعلان په معنا یاده کړه.