اروپایي ټولنې له کووید۱۹ سره مبارزې لپار د نړۍ له هیوادونو د ۶،۹ میلیارده ډالرو مرستو له راټولیدنې خبر ورکړ.

رویترزخبري آژانس لیکلي دي چې د پیلنۍ په ورځ (جون ۲۷) د نړۍ بیلابیلو هیوادونو د اروپایي ټولنې د کمېسیون په مشرۍ یوه ویډیویي ناسته ترسره کړه چې په کې د ۴۰ هیوادونو استازو حضور درلود او د کرونا ویروس پر وړاندې مبارزې لپاره یې مالي مرستو ژمنې وکړې.

د اروپایي ټولنې چارواکو اعلان وکړ چې دا مالي مرستې د کووید۱۹ ضد واکسین جوړیدو،د آزمښتونو د ترسره کیدو او د نا روغانو د درملنې په موخه ترسره کیږي.

په دې ناسته کې د اروپا د کمېسیون مشرې اورزولا فون درلاین،د آلمان لومړۍ وزیرې، د بریټانیا لومړي وزیر او همدا راز د فرانسې ولسمشر ګډون کړی وو او د کرونا ویروس ضد واکسین ته د ټولیز لاس رسي په برخه کې د همغږۍ پر اقدام ټينګار وکړ.

ویل شوي دي چې په دې ناسته کې د نړۍ د بیلابیلو هیوادونو د مالي مرستو ترڅنګ،د اروپا د پانګه اچونې بانک د مالي مرستو ډیری برخه ژمنه کړې چې۵،۵ میلیارد ډالرو ته رسیږي.

وړاندې له دې هم د اروپايي ټولنې کمېسیون د کرونا ویروس د واکسین لپاره ۱۰ میلیارده یورو راټولې کړې وې.

د آمریکا د جان هاپکینز پوهنتون د شمیرنو پربنسټ،په نړۍ کې په کرونا ویروس د اخته کسانو شمیر لس میلیونه او ۱۱۰ زره کسانو ته رسیږي چې له دې منځه بیا څه باندې پنځه لکه (۵۰۰۰۰۰) کسانو خپل ژوند له لاسه ورکړی دی.