د روغتیا نړیوال سازمان د چین هیواد له لورې د کرونا دویم تولید شوي واکسین بیړنۍ ګټنه تایید کړه.

د روغتیا نړیوال سازمان لوی منشي په یوې اعلانپاڼه کې ویلي چې د دوی څیړنو ښودلې چې د چین له لورې د دویم تولید شوي واکسین سینوواک اغیزې او کیفیت سل په سلو کې د کوویډ نوولس ناروغۍ په مخنیوي کې اغیزمن دی او له نړیوال ستندردونو سره هم برابر دی.

دا په نړۍ کې د کرونا اتم واکسین دی چې د دې سازمان له لورې د بیړنۍ ګټې جواز ترلاسه کوي.

د ګزارشونو پر بنسټ تراوسه په نړۍ کې یو میلیارد او ۹۰۰ میلیون وګړو د کرونا واکسین ترلاسه کړی دی.

ویل کیږي چې چین د کرونا پر وړاندې د ډیرو واکسین شویو وګړو لرونکو هیوادونو په کتار کې راځي او د چین وروسته، امریکا، هند، روسیه، برازیل، بریټانیا، آلمان، فرانسه، ایټالیا، مکسیکو، ترکیه، اسپانیا، اندونیزیا او کاناډا په دې نوملړ کې شامل دي.