د ملګرو ملتونو سازمان سترمنشي انتونیوګوتریش د افغان کډوالو اړوند نړیواله ناسته کې د ګډون لپاره نن یوه نۍ سهار(سلواغې ۲۷/فبروري ۱۶)اسلام آباد ته ولاړ.
پاکستاني رسنیو راپور ورکړی دی چې ښاغلی ګوتریش په دې نړیواله ناسته کې چې د ” له افغان کډوالو څلویښت کاله کوربه توبه” په نوم په لاره اچول شوې سبا دوه نۍ وینا کوي.
دملګرو ملتونو سازمان د ستر منشي ویاند ویلي دي چې د دې دوه ورځينۍ ناستې د ترسره کیدو موخه په تیرو څو لسیزو کې د میلیونونو افغان کډوالو څخه د پاکستان له کوربه توب څخه ستاینه ده.
په دې ناسته کې ستر امریکایي چارواکي،د پاکستان لومړی وزیر عمران خان او د ملګرو ملتونو له سازمان څخه یو پلاوی ګډون کوي.